Niyaz Nazr Fatmi
tire didar ke saare marahil se zara pahle
karunga mashvara bhi badr-e-kamil se zara pahle
samundar paar karne ki ḳhushi men is qadar kuuda
ki kashti ho ga.i gharqab sahil se zara pahle
lagi aḳhbar ki surḳhi jo kanon men to jaag uTTha
kisi surat lagi thi aankh mushkil se zara pahle
mujhe aghosh men lene se pahle kanpta dariya
pukara hota tum ne kaash sahil se zara pahle
ghalat andaza tha ḳhargosh ka kachhve ke baare men
pahunchna hai pahunch ja.enge kahil se zara pahle
saval-e-haq-parasti par ye bole hazrat-e-va.is
nipaTne dijiye mujh ko to jahil se zara pahle
yaqin paiham jo hota ‘nazr’ us ki pasbani ka
na rukte aap ke phir paanv sahil se zara pahle
Leave a Reply