Meem Sheen Najmi
hai kitni ḳhud-gharaz makkar duniya ham ne dekha hai
ḳhud apni hi tabahi ka tamasha ham ne dekha hai
hamare ghar jale hain ḳhud hamare hi charaghon se
khuli ankhon se apnon ka irada ham ne dekha hai
ye sajda-rez tak hoti hai duniya jabr ke aage
kahin Dar se baja laati hai mujra ham ne dekha hai
qayamat-ḳhez tufanon men barsati havaon men
ubharte Dubte dil ka jazira ham ne dekha hai
tasalli dene vaale ḳhud maza lete hain hans hans kar
pas-e-ehsan-o-hamdardi dikhava ham ne dekha hai
saf-e-matam ki tayyari kahin shahna.iyan sargarm
dikhati hai ye duniya rang kya kya ham ne dekha hai
hua kya is se hasil mai-kade vaalo bata dena
jo girne aur sambhalne ka tamasha ham ne dekha hai
ḳhulus-e-dil se saari sarhaden mil jaati hain ‘najmi’
jahan milte hain sab raste vo rasta ham ne dekha hai
Leave a Reply