Josh Malsiani
nazar nazar se milao hijab kya ma.ani
niyaz-e-ishq se ye ijtinab kya ma.ani
chunenge ek mujhi ko vo har sitam ke liye
ḳhata kare nazar-e-intiḳhab kya ma.ani
gharaz hi kya thi tamasha-e-dahr se tum ko
ab aa.e ho to ye ruḳh par naqab kya ma.ani
vaqar-e-mehr-o-vafa ko to sar-nigun na karo
har ik saval ka ulTa javab kya ma.ani
miri nazar hi se ye ehtiyat hai varna
naqab ke liye band-e-naqab kya ma.ani
had-e-shumar se bahar hain jab gunah mire
hisab ke liye yuun be-hisab kya ma.ani
sukun-e-dil to jahan men kahin nahin ai ‘josh’
phir is sukun ke liye iztirab kya ma.ani
Leave a Reply