Giraftari Ki Lazzat Aur Nira Aazad Kya Jaane

giraftārī kī lazzat aur nirā āzād kyā jaane

ḳhushī se kātnā ġham kā dil-e-nāshād kyā jaane

isī ġhaflat se lazzat haigī hāsil ḳhvāb-e-shīrīñ meñ

hamārī talḳh-kāmī kā mazā farhād kyā jaane

tasavvur sūrat-e-maanī kā bāñdhe hai qusūr-e-dil

haqīqat kī ye sanat mānī-o-bahzād kyā jaane

taraddud meñ hai mere zab.h ke ai ‘ishq’ vo ab tak

nigāh-e-nāz se bismil huā jallād kyā jaane

Leave a Comment