apni pasand chhoḌ di us ki ḳharid li
virse ka khet bech ke koThi ḳharid li
ik umr apne beTon ko ungli thama.i phir
buḌhe ne ik dukan se laThi ḳharid li
vaise to nirḳh kam hi the gandum ke is baras
aa.i thi tere gaanv se mahngi ḳharid li
ham doston ke pyaar men ham-rang hain libas
aur log kah rahe hain ki vardi ḳharid li
tasvir apni ḳhud hi musavvir ko bha ga.i
ḳhud gallery men pesh ki ḳhud hi ḳharid li
ai hijr-zad tum ko bhi hai arzu-e-vasl
ai dasht-zad tum ne bhi kashti ḳharid li
dar-asl mas.ala to hai chalna ghaḌi ke saath
is se gharaz nahin hai ki kaisi ḳharid li
Leave a Reply