ye kahan se mauj-e-tarab uThi ki malal dil se nikal ga.e
vahi sub.h-o-sham jo the garan nafas-e-bahar men Dhal ga.e
ye dayar-e-shauq hai ham-nashin yahan laghzishon men bhi husn hai
jo miTe vo aur ubhar ga.e jo gire vo aur sambhal ga.e
hasin zindagi ki talash thi hamen sarḳhushi ki talash thi
hue zindagi se jo ashna to jarahaton se bahal ga.e
tire sogvaron ki zindagi kabhi mutma.in na guzar saki
jo bujhi kabhi koi tishnagi ka.i aur dard machal ga.e
miri arzuon ke ḳhvab the ki faza-e-husn-o-shabab the
kahin nik.haton men bikhar ga.e kahin rang-o-nur men Dhal ga.e
unhen rahaton ka ḳhayal hai na sa.ubaton ka malal hai
jo tiri talash men chal paḌe jo tiri talab men nikal ga.e
hai bhari bahar to kya karun na mile qarar to kya karun
mire samne hain vo ashiyan jo bhari bahar men jal ga.e
Leave a Reply