Mere Aasan Se Lahje Ki Mushkil Kaun Samjhega

mire āsān se lahje kī mushkil kaun samjhegā

usī patthar meñ hai maujūd ik dil kaun samjhegā

udāsī ke sivā rahne khañDar meñ kaun aa.egā

dil-e-vīrāñ kī vīrānī ko mahfil kaun samjhegā

nahīñ hotā vahāñ par bhī jahāñ hotā huuñ maiñ aksar

na honā hai mire hone meñ shāmil kaun samjhegā

musībat kī ghaḌī meñ kaam apne hī to aate haiñ

agar tū hī nahīñ samjhā to ai dil kaun samjhegā

hazāroñ chāhne vāloñ meñ us ke ek maiñ bhī huuñ

ujāloñ meñ bhalā jugnū kī jhilmil kaun samjhegā

Leave a Comment