Aftab Shah Alam Sani
dekho to kis ada se rukh par hain daali zulfen
juun maar dasti hain dil dilbar ki kaali zulfen
chahe hain jis na tis ko bandhen girah men apni
dil lene ko bala hain ye pech vaali zulfen
misl-e-salasil is men uqde hazar-ha hain
tuk pech-o-tab se main dekhin na khali zulfen
mar-siyah juda kab rahta hai ganj-e-zar se
hoti nahin hain us ke rukh se nirali zulfen
thi raat jo yakayak din dekhne lage sab
jab ‘aftab’ us ne rukh se utha li zulfen
Leave a Reply