Mushtaq Anjum
us ki ankhon men haya aur ishara bhi hai
band honTon se mujhe is ne pukara bhi hai
us ne kandhe pe hamare jo kabhi sar rakkha
yuun laga ziist men koi to hamara bhi hai
riit bhi garm hai aur dhuup bhi hai tez magar
us ki pur-kaif rifaqat ka sahara bhi hai
chuum kar haath mira deta hai vo dil ko kasak
kaisa dushman hai ki jo jaan se pyara bhi hai
us ke ruḳhsar pe barish ki vo halki bunden
phuul par qatra-e-shabnam ka nazara bhi hai
itna itrana bhi kuchh Thiik nahin yaad rahe
ziist men naf.a bhi hai aur ḳhasara bhi hai
tairta jaata huun aur soch raha huun ‘anjum’
is samundar ka kahin koi kinara bhi hai
Leave a Reply