hava ki andhi panahon men mat uchhal mujhe
zamin hisar-e-kashish se na tu nikal mujhe
siva-e-ranj-e-nadamat na kuchh mila tum ko
main kah raha tha banao na tum misal mujhe
shikast-e-dil ne ajab gham ko suraten di hain
rafaqaton ki ghaḌi hai zara sambhal mujhe
main ḳhvab ḳhvab jaziron ki sair ko niklun
uTha ke parda-e-shab hairaton men Daal mujhe
kabhi kabhi use dil se aziz-tar jaana
ye sar jo dosh pe lagta raha vabal mujhe
zamin main tiri chahat men zer-e-dam aaya
asiir kar nahin paaya tha koi jaal mujhe
bayaz-e-vaqt pe us ne likha hai naam mira
yaqin kar ki na hoga kabhi zaval mujhe
suḳhan ke kuchh to guhar main bhi nazr karta chalun
ajab nahin ki karen yaad maah o saal mujhe
Leave a Reply