Hawa Ki Andhi Panahon Mein Mat Uchhaal Mujhe

havā kī andhī panāhoñ meñ mat uchhāl mujhe

zamīñ hisār-e-kashish se na tū nikāl mujhe

sivā-e-rañj-e-nadāmat na kuchh milā tum ko

maiñ kah rahā thā banāo na tum misāl mujhe

shikast-e-dil ne ajab ġham ko sūrateñ dī haiñ

rafāqatoñ kī ghaḌī hai zarā sambhāl mujhe

maiñ ḳhvāb ḳhvāb jazīroñ kī sair ko niklūñ

uThā ke parda-e-shab hairatoñ meñ Daal mujhe

kabhī kabhī use dil se azīz-tar jaanā

ye sar jo dosh pe lagtā rahā vabāl mujhe

zamīn maiñ tirī chāhat meñ zer-e-dām aayā

asiir kar nahīñ paayā thā koī jaal mujhe

bayāz-e-vaqt pe us ne likhā hai naam mirā

yaqīn kar ki na hogā kabhī zavāl mujhe

suḳhan ke kuchh to guhar maiñ bhī nazr kartā chalūñ

ajab nahīñ ki kareñ yaad maah o saal mujhe

Leave a Comment