Aurang Zeb
us nigah-e-naz ne yuun rat-bhar tajsim ki
sab charaghon men barabar raushni taqsim ki
raat pichhe paḌ ga.i thi ḳhauf ke saa.e liye
ḳhvab se aage nikal kar vaqt men tarmim ki
aa.ina ho ja.ega ye dasht mujh par ek din
girhen khulti ja rahi hain ahsan-e-taqvim ki
donon hi aa kar alif ki raushni men zam huiin
ik tajalli laam ki aur ik tajalli miim ki
shahd ka bhi zikr ho sakta tha hone ko magar
us ke lahje ke mutabiq baat chheḌi niim ki
main hi tha apne muqabil ḳhvahishon ki Dor men
harna mushkil laga so jiit hi taslim ki
dost lekin tujh ko ye izzat na raas aa.i kabhi
main ne apne aap se baḌh kar tiri takrim ki
shaam hote hi charaghon ko sajaya taaq men
saara din so kar guzara raat ki tazim ki
umr-bhar suraj ke aage haath phaila.e magar
ik sitare ne mujhe ye raushni ta.alim ki
khinch kar aflak pe ik surma.i raushan lakir
chand ne surat badal Daali hamari theem ki
main ne ‘zeb’ us ko mohabbat men kaha tha mujh se mil
us ne meri baat ki kitni ghalat tafhim ki
Leave a Reply