Rehman Faris
yahi dua hai yahi hai salam ishq ba-ḳhair
mire sabhi rufqa-e-kiram ishq ba-ḳhair
dayar-e-hijr ki suuni udaas galiyon men
pukarta hai koi sub.h-o-sham ishq ba-ḳhair
main kar raha tha dua ki guzarishen us se
so kah ga.i hai udasi ki shaam ishq ba-ḳhair
baḌe ajiib hain shahr-e-junun ke bashinde
hamesha kahte hain ba.ad-az-salam ishq ba-ḳhair
ye rah zarur tumhare hi ghar ko jaati hai
likha hua hai yahan gaam gaam ishq ba-ḳhair
bayan ki hai ghazal-var dastan-e-ishq
so is kitab ka rakkha hai naam ishq ba-ḳhair
ufuq ke paar mujhe yaad kar raha hai koi
abhi mila hai udhar se payam-e-ishq ba-ḳhair
Leave a Reply