kis ki us tak rasai hoti hai
haan magar jis ki aai hoti hai
yaar ham se siyah-bakhton ki
zulf tak kab rasai hoti hai
khuub mil kar gale se ro lena
is se dil ki safai hoti hai
dubti hai hamari kashti-e-dil
aap se ashnai hoti hai
shor hai al-firaq ka har dam
ham se un se judai hoti hai
lashkar-e-gham ki kishvar-e-dil par
raat din ab chadhai hoti hai
un ki mahfil men jaate darta huun
vaan lagai-bujhai hoti hai
us ke dar par ‘haqir’ tum bhi chalo
vahin mushkil-kushai hoti hai