poet

Hua Hai Taur-E-Barbaadi Jo Be-Dastur Pahlu Mein

hua hai taur-e-barbadi jo be-dastur pahlu men

dil-e-betab ko rahta hai na-manzur pahlu men

ajab dil ko lagi hai lau ajab hai nuur pahlu men

kiya hai ishq ne raushan charagh-e-tur pahlu men

kaha jo main ne mere dil ki ik tasvir khinchva do

manga kar rakh diya ik shisha chaknachur pahlu men

khushi ho ho ke ulfat men jo bar-e-gham uthata hai

dil-e-shaida hai ya hai ishq ka mazdur pahlu men

havas hai dil ko tere haath se majruh hone ki

laga de ik chhuri ai qatil-e-maghrur pahlu men

ham-aghoshi se jab se yaar ne pahlu-tahi ki hai

usi din se hui hai be-kali mamur pahlu men

tiri tasvir jab main DhunDne uthta huun jannat men

bitha leti hai minnat kar ke mujh ko huur pahlu men

tadap jaata hai dil teri judai yaad aati hai

chamak jaata hai ya-rab kis pari ka nuur pahlu men

tasadduq tujh pe jis dam najd men ho jaega majnun

jagah dega tira divana-e-maghfur pahlu men

khadang-e-naz ki aamad par aamad is men rahti hai

ye bab-e-dil-kusha hai ya ki hai nasur pahlu men

ilahi mere us ke vo ham-aghoshi ki surat ho

ki jaise dil ki hai pechidgi mashhur pahlu men

hua is darja ghalba us pe thanDi thanDi sanson ka

ki akhir dil hamara ho gaya kafur pahlu men

nai tir-e-lab-e-maashuq ne ki rakhna-pardazi

tasallut to kiya dil men hua nasur pahlu men

barabar apne baithe dekha hai yusuf ko ruuya men

khuda chahe to aa baithe vo rashk-e-hur pahlu men

muslim us ke hone ki ‘sharaf’ tadbir batlao

pada hai muddaton se shisha-e-dil chuur pahlu men

More Poems

Leave a Comment