KHushk Putli Se Koi Surat Na Thahrai Gai

Khursheed Rizvi

ḳhushk putli se koi surat na Thahra.i ga.i

aankh se aansu ga.e meri ki bina.i ga.i

sub.h-dam kya DhunDte ho shab-ravon ke naqsh-e-pa

jab se ab tak bar-ha mauj-e-saba aa.i ga.i

ro raha huun har purani chiiz ko pahchan kar

jaane kis ki ruuh mere ruup men laa.i ga.i

mutma.in ho dekh kar tum rang-e-tasvir-e-hayat

phir vo shayad vo nahin jo mujh ko dikhla.i ga.i

chalte chalte kaan men kis ki sada aane lagi

yuun laga jaise miri barson ki tanha.i ga.i

ham ki apni raah ka patthar samajhte hain use

ham se jaane kis liye duniya na Thukra.i ga.i