Murtaza Barlas
duniya ko dekhiye zara ankhen to kholiye
suraj chaḌha hai sar pe baḌi der so liye
saari masarraten tiri ḳhushiyon pe vaar diin
jitne bhi gham mile tire gham men samo liye
ham ko na-jane kya hua phulon ko dekh kar
hathon men ham ne jaan ke kanTe chubho liye
majburiyan kahen ki ise sadgi kahen
jis ne bhi hans ke baat ki ham saath ho liye
ru-e-ḳhitab hai kisi nazuk-mizaj se
chehre pe haal likhiye nigahon se boliye
siipi khuli rahegi jo moti nikal ga.e
ankhon ki sipiyon se javahar na roliye
taaza rakha hai zehn men karb-e-shikastagi
jab kuchh na ban paḌa to kahin chhup ke ro liye
Leave a Reply