dil men ḳhuun aur aankh men paani bahut
ek thodi si pareshani bahut
chup rahen to dil sarapa iztirab
baat karne men pashemani bahut
dekhe-bhale raste gham ke tamam
dil ki galiyan jani-pahchani bahut
us ke jaise honge lekin vo kahan
naqsh-e-avval ek aur saani bahut
ham kahan hote the ḳhud ko dastiyab
khal rahi hai ab ye arzani bahut
kis tarah rakhte ham aḳhir jaan aziiz
dil kiya karta tha man-mani bahut
us se kya be-qadr-dani ka gila
ham ne qadr apni kahan jaani bahut
ḳhud use ‘shabnam’ banate hain muhal
dekhte hain jis men asani bahut