Anees Ansari
pathrili si shaam men tum ne aise yaad kiya janam
saari raat tumhari ḳhatir main ne zahr piya janam
suraj ki manind bana huun reza reza bikhra huun
ab jivan ka sar-chashma huun vaise ḳhuub jila janam
tum ne mujh men jo kuchh khoya us ki qimat tum jaano
main ne tum se jo kuchh paaya hai vo besh-baha janam
tum ko bhi pahchan nahin hai shayad meri uljhan ki
lekin ham milte rahte to achchha hi rahta janam
ye sahab jin se mil kar sab ka ji ḳhush ho jaata hai
raat ga.e tak un ke kamre men jalta hai kya janam
rakh paao to rok lo ham ko gahra.i ke baasi hain
bahte paani ke qatron men hota hai dariya janam
dard-e-juda.i men likkhe hain sher tumhare naam bahut
tum mere ghar men rahtin to kya aisa hota janam
Leave a Reply