aish se be-niyaz hain ham log
be-khud-e-soz-o-saz hain ham log
jis tarah chahe chhed de ham ko
tere hathon men saaz hain ham log
be-sabab iltifat kya maani
kuchh to ai chashm-e-naz hain ham log
mahfil-e-soz o saaz hai duniya
hasil-e-soz o saaz hain ham log
koi is raaz se nahin vaqif
kyuun sarapa niyaz hain ham log
ham ko rusva na kar zamane men
bas-ki tera hi raaz hain ham log
sab isi ishq ke karishme hain
varna kya ai ‘majaz’ hain ham log
Leave a Reply