Iqbal Ashhar
kitne bhule hue naghmat sunane aa.e
phir tire ḳhvab mujhe mujh se churane aa.e
phir dhanak-rang tamannaon ne ghera mujh ko
phir tire ḳhat mujhe divana banane aa.e
phir tiri yaad men anhken huiin shabnam shabnam
phir vahi niind na aane ke zamane aa.e
phir tira zikr kiya bad-e-saba ne mujh se
phir mire dil ko dhaḌakne ke bahane aa.e
phir mire kasa-e-ḳhali ka muqaddar jaaga
phir mire haath mohabbat ke ḳhazane aa.e
shart sailab samone ki laga rakkhi thi
aur do ashk bhi ham se na chhupane aa.e
Leave a Reply