jab bhi tanha mujhe paate hain guzarte lamhe
teri tasvir si rahon men bichha jaate hain
main ki rahon men bhatakta hi chala jaata huun
mujh ko khud meri nigahon se chhupa jaate hain
mere bechain khayalon pe ubharne vaali
apne khvabon se na bahla meri tanhai ko
jab tiri saans miri saans men tahlil nahin
kya karengi miri banhen teri angdai ko
jab khayalon men tire jism ko chhu leta huun
zindagi shoala-e-mazi se jhulas jaati hai
jab guzarna huun gham-e-hal ke virane se
mere ehsas ki nagin mujhe das jaati hai
ham-safar tujh ko kahun ya tujhe rahzan samjhun
raah men la ke mujhe chhod diya hai tu ne
ek vo din ki tira pyaar basa tha dil men
ek ye vaqt ki dil tod diya hai tu ne
maazi o haal ki tafriq vo qurbat ye firaq
pyaar gulshan se chala aaya hai zindanon men
be-zari apni sadaqat ko parakhti hi rahi
tal gaya husn zar-o-sim ki mizanon men
ghair se resham-o-kam-khvab ki rahat pa kar
tu mujhe yaad bhi aaegi to kya aaegi
ek mustaqbil-e-zarrin ki tijarat ke liye
tu mohabbat ke taqaddus ko bhi thukraegi
aur main pyaar ki taqdis pe marne vaala
dard ban kar tire ehsas men bas jaunga
vaqt aaega to ikhlas ka badal ban kar
teri jhulsi hui raton pe baras jaunga
Leave a Reply