Amardeep Singh
shahr ki viran saḌak par jashn-e-gham karte hue
ja raha huun ḳhushki-e-mizhgan ko nam karte hue
zindagi tanha safar par gamzan hoti hui
aur ham yadon ko pichhli ham-qadam karte hue
bol uThte hain ka.i barson purane zaḳhm bhi
dil ho jab masruf apni chup raqam karte hue
us ka bhi kahna yahi barbad ho jaoge tum
aur ham bhi Thiik vaisa dam-ba-dam karte hue
mehrbani lazmi hai ḳhud bhi apni zaat par
harj kaisa aap apne par karam karte hue
dang rah jaoge tum apne karam-farma ko jab
dekh loge ik dafa ghar men sitam karte hue
ain-mumkin hai taḌap uThna hamara ek din
yaad men allah ki yad-e-sanam karte hue
jaane kis dam le uḌe ye maut ka jhonka ‘amar’
ek din ḳhak-e-badan ko ḳhud men zam karte hue
Leave a Reply