Deepak Qamar
har parinde ki baat sunta hai
be-zaban peḌ sab se achchha hai
jis qadar ham ne bhed samjha hai
koi manzil na koi rasta hai
in andheron ko kis liye kosen
raushni ban ke phuul khilta hai
chalne vaala nikal gaya aage
qafila raste men Thahra hai
jis ki ḳhatir hain jagte rahe ham
vo abhi palne men sota hai
in dinon main huun tanha tanha sa
ek gum-sum ḳhayal rahta hai
be-gharon ke qadam nahin rukte
un ka angan tamam duniya hai
dil bahalta hujum men rah kar
ḳhud se Darta hua vo tanha hai
kal ki baton se be-ḳhabar ham hain
saat janmon ka kya bharosa hai
Leave a Reply