hai ayaan ru-e-yar aankhon men
chhai hai kya bahar aankhon men
shoale uthte hain baar baar ajiib
kaun hai shama-var aankhon men
kaun hai shahsavar-e-tausan-e-husn
jis ka hai ye ghubar aankhon men
kaisi mai tu ne di pila mujh ko
ab talak hai khumar aankhon men
dil hai bulbul sifat ba-nala-o-ah
kaun hai gul-ezar aankhon men
shauq men kis ki hai nikal aaya
dil-e-pur-iztirar aankhon men
ubal aata hai kis ki shauq men aah
khun-e-dil baar baar aankhon men
har taraf hai ayaan rukh-e-dil-dar
hai khizan nau-bahar aankhon men
faiz-e-khadim-safi se hai ‘asim’
jalva-gar husn-e-yar aankhon men
Leave a Reply