Hasan Akhtar Jaleel
ye raat kaash isi dilkashi se Dhalti rahe
ufuq ke paas pahaḌon men aag jalti rahe
daraz-tar ho ḳhayalon ki bastiyon ka safar
miri talash sada zaviye badalti rahe
koi charagh na mere harim-e-gham men jale
ḳhud apni aanch men ye tirgi pighalti rahe
shikasta ho ke bhi naumid ho na dil tera
bujhe charagh men bhi raushni machalti rahe
safine Duub ga.e kitne dil ke sagar men
ḳhuda kare tiri yadon ki naav chalti rahe
Leave a Reply