jab khule muTThi to sab paḌh len ḳhat-e-taqdir ko
ji men aata hai miTa duun haath ki tahrir ko
jism sannaTe ke aalam se guzarta hi nahin
be-hisi ne aur aur bojhal kar diya zanjir ko
bahta dariya hai ki a.ina-gari ka silsila
dekhta rahta huun paani men tiri tasvir ko
sub.h-e-nau ne kaaT Daale sham-e-zulmat ke hisar
kis tarah roke koi kirnon ki ju-e-shir ko
dhaḌkanon ki chaap ruk jaa.e to aa.e niind bhi
saath le kar phir raha huun shor-e-dar-o-gir ko
jab ma.ani ka ujala hi na ho alfaz men
kyuun karen raushni suḳhan ki sham-e-be-tanvir ko
dhund saa.e ḳhauf gahri chup hava ki be-ruḳhi
kaise aalam men chala huun dahr ki tasḳhir ko
apni peshani pe shohrat ki lakiren khinch le
apne siine se laga le katba-e-tash.hir ko
aks a.ine se pahle tha to phir ‘siddiqi’ kyuun
ḳhvab se pahle na dekha ḳhvab ki ta.abir ko
Leave a Reply