Dast-E-Pur-Khun Ko Kaf-E-Dast-E-Nigaran Samjhe

dast-e-pur-khun ko kaf-e-dast-e-nigaran samjhe

qatl-gah thi jise ham mahfil-e-yaran samjhe

kuchh bhi daman men nahin khar-e-malamat ke siva

ai junun ham bhi kise ku-e-baharan samjhe

tuute dhage hi se karte hain rafu chak-e-jigar

kaun bechargi-e-sina-figaran samjhe

haan vo bedard to begana hi achchha yaaro

jo na tauqir-e-gham-e-dard-gusaran samjhe

khanda-zan us pe rahe halqa-e-zanjir-e-junun

jo na kuchh manzilat-e-silsila-daran samjhe

aaj se ham ne bhi zakhmon ko tabassum jaana

razm ko bazm-gah-e-lala-ezaran samjhe

tod den ham jo na talvar to kahiye ‘majruh’

tegh-zan kya hunar-e-zakhm-shiaran samjhe

Leave a Comment