Pattharon Mein Aaina Maujud Hai

pattharoñ meñ aa.inā maujūd hai

ya.anī mujh meñ dūsrā maujūd hai

zamzama-pairā koī to hai yahāñ

sehn-e-gulshan meñ havā maujūd hai

ḳhvāb ho kar rah gayā apne liye

jaag uThne kī sazā maujūd hai

ik samundar hai dil-e-ushshāq meñ

jis meñ har mauj-e-balā maujūd hai

āsmānī ghanTiyoñ ke shor meñ

us badan kī har sadā maujūd hai

maiñ kitāb-e-ḳhāk kholūñ to khule

kyā nahīñ maujūd kyā maujūd hai

jannat-e-arzī bulātī hai tumheñ

aao ‘sarvat’ rāsta maujūd hai

Leave a Comment