bhala ho pir-e-mughan ka idhar nigah mile
faqir hain koi chullu khuda ki raah mile
kahan the raat ko ham se zara nigah mile
talash men ho ki jhuta koi gavah mile
qarib-e-mai-kada mujh ko jo khanqah mile
gale savab ke kya kya mire gunah mile
vo roz-e-hashr hai duniya nahin ki raah mile
kahan chhupoge jo do chaar dad-khvah mile
miri kharabi men aa kar vo chaukdi bhule
ki phir na khana-kharabi ko ghar ki raah mile
tira dil aae kisi par to arsh hil jaae
asar talash men hai is tarah ki aah mile
tumhare kuche men har roz vo qayamat hai
ki saaya dhund raha hai kahin panah mile
tira ghurur samaya hai is qadar dil men
nigah bhi na milaun jo badshah mile
sar-barahna majnun pe ashiyan hai taaj
na rakkhe sar pe jo faghfur ki kulah mile
falak ki tarah jafaen na kijiye har roz
isi qadar hai ye neamat jo gaah gaah mile
tumhare husn se kya rutba mah-e-kanan ko
vahi to chand jise dubne ko chaah mile
sab ahl-e-hashr jab apne kiye ko paenge
bada maza ho jo mujh ko mira gunah mile
karun main arz agar jaan ki amaan paun
kahun pate ki agar qahr se panah mile
ye hai maze ki ladai ye hai maze ka milap
ki tujh se aankh ladi aur phir nigah mile
hua hai dard-e-jigar se ye ghar mira tarik
ki maut dhundti phirti hai koi raah mile
na us ko sabr na tasir ka pata ya rab
jala diya hai mujhe khaak men ye aah mile
bala se dava-e-ulfat na pesh karte ham
mile hue hain jo dushman se vo gavah mile
thahar na aah miri jaan le ke chalte ho
safar kare jo musafir ko zad-e-rah mile
masal suni hai ki milne se koi milta hai
milo to aankh mile dil mile nigah mile
qamar ko jama-e-shab to basar ko parda-e-chashm
kai libas tire nuur ko siyah mile
asar kahan se mile jab ye phuut ho baham
alag alag rahe donon na harf-e-ah mile
laga ke paanv men us ke udaun qasid ko
agar mujhe tire tausan ki gard-e-rah mile
is inqalab men dhundo jo mushk aur kafur
to ye safed mile aur vo siyah mile
naved-e-bakhshish-e-isyan use suna dena
jo sharmsar kahin ‘dagh’-e-ru-siyah mile
Leave a Reply