Sanjay Mishra Shauq
dene vaale tujhe dena hai to itna de de
aa.ina us ko diya hai mujhe chehra de de
raste band nazar aate hain charon-janib
mere maula mujhe ummid ka tesha de de
puchhti hain miri ankhen ki tu kab aa.ega
jaate jaate mujhe itna to dilasa de de
is tarah dil se nikala mujhe tu ne jaise
apne hi ghar pe kisi ghair ko qabza de de
main bhi pyasa huun tire dar pe khaḌa huun kab se
tu samundar hai mujhe ek hi qatra de de
mere lahje ne mire qad ko kiya itna buland
ab to har dost ki ḳhvahish hai ki dhakka de de
Leave a Reply