kis ka bhed kahan ki qismat pagle kis janjal men hai
baazi hai ik sada-kaghaz saara kartab chaal men hai
ek rahen ya do ho jaa.en rusva.i har haal men hai
jivan ruup ki saari shobha jivan ke janjal men hai
tujh se bichhaḌ kar tujh se mil kar donon mausam dekh liye
baat jahan thi ab bhi vahin hai farq zara sa haal men hai
aḳhir uupri hamdardi ko rang to ik din laana tha
baat thi pahle chand gharon tak ab duniya bhaunchal men hai
tum apni ankhon ki laali phulon men taqsim karo
mere dil ka haal na puchho rahne do jis haal men hai
jivan bhedan ki chinta chhoḌo aao kuchh is par baat karen
ham dharti ke phande men hain dharti kis ke jaal men hai
‘anjum’ pyaar jise kahte hain us ke Dhang nyare hain
chup men hai sukh chain na koi rahat qil-o-qal men hai
Leave a Reply