Poet
koi tasvir yahan a.ina-ḳhanon men nahin
ab hadaf kaun ho jab tiir kamanon men nahin
be-hisi jabr-e-musalsal ka natija Thahri
harf maslub hue nutq zabanon men nahin
log kuchh itne haqiqat ke parastar hue
ya.ani vo shaḳhs naya hai jo puranon men nahin
ham ki maazi bhi hain imroz bhi hain farda bhi
ham sabhi kuchh hain magar qaid zamanon men nahin
shaḳh-dar-shaḳh tarashi ga.iin rahen kitni
par kushada to hue rabt uḌanon men nahin
aisa ashob to pahle kabhi dekha na suna
bhiiḌ galiyon men hai log apne makanon men nahin
vo mohabbat hi mohabbat hai ye irfan bhi hua
us ka maskan to dilon men hai chaTanon men nahin
Leave a Reply