Rais Amrohvi
mahjur-e-har-anjuman hain ham log
apne men jila-vatan hain ham log
jo sabza-o-barg se ho mahrum
vo shabnam-e-be-kafan hain ham log
ai apni hi ḳhalvaton men mahbus
shayad tiri anjuman hain ham log
ḳhud apne shu.ur-e-jan se malbus
be-paikar-o-pairhan hain ham log
ai alam-e-rang rang taḳhliq
azurda jan-o-tan hain ham log
ḳhud apne vajud men taqayyud
pa-basta be-rasan hain ham log
har ahd ki shahriyat se mahrum
har shahr men be-vatan hain ham log
Leave a Reply