Ye Hijr Ka Rasta Hai Jis Par Main Tanha Tanha Si Chal Rahi Hun

Najma Shaheen Khosa

ye hijr ka rasta hai jis par main tanha tanha si chal rahi huun

bas us ki yadon ki dhuup hai aur main qatra qatra pighal rahi huun

ye vasl-lamhon ki raushni hai jo dil ki duniya men aa basi hai

mahakti yadon ki chandni hai main jis ki kirnon se jal rahi huun

rah-e-vafa men bhaTakti rahti jo tere sapnon men gum na rahti

tire ḳhayalon men ji rahi huun tire tasavvur men Dhal rahi huun

shikasta-ḳhvabon ki kirchiyan hain jo meri ankhon men chubh rahi hain

main ḳhar-zaron men chal rahi huun main girte girte sambhal rahi huun

zamane bhar ki ye talḳhiyan hain jo mere lahje men aa basi hain

main apne sheron men dhire dhire ye zahar-e-maya ugal rahi huun

karungi kya bal-o-par ko apne qafas men jiina jo lazmi hai

kahan hai ‘shahin’ shadmani dukhon ki duniya men pal rahi huun