Nihal Sevharvi
huun kalbud-e-ḳhak men mehman koi din aur
qismat men hai pabandi-e-zindan koi din aur
hai daftar-e-alam ko zarurat abhi meri
karni hai mujhe ḳhidmat-e-unvan koi din aur
aane hi ko hai mausam-e-gul ḳhair mana le
daman koi din aur gareban koi din aur
ai abr yunhi qatra-e-fashan rah abhi kuchh roz
mai-ḳhvaron pe hota rahe ehsan koi din aur
amada-e-ruḳhsat hai mira ahd-e-javani
ḳhatir ka lahu chuus le arman koi din aur
kuchh roz Thahar aur bhi ai sham.a-e-shab-afroz
pur-nur rahe mera shabistan koi din aur
kyuun ru-kash-e-alam hai nihal-e-jigar-afgar
rahna tha nava-sanj-e-ghazal-ḳhvan koi din aur
Leave a Reply