Poet
sitam vo tum ne kiye bhule ham gila dil ka
hua tumhare bigaḌne se faisla dil ka
bahar aate hi kunj-e-qafas nasib hua
hazar haif ki nikla na hausla dil ka
chala hai chhoḌ ke tanha kidhar tasavvur-e-yar
shab-e-firaq men tujh se tha mashghala dil ka
vo rind huun ki mujhe hatkaḌi se bai.at hai
mila hai gesu-e-janan se silsila dil ka
vo zulm karte hain ham par to log kahte hain
ḳhuda bure se na Daale muamla dil ka
hazar fasl-e-gul aa.e junun! vo josh kahan
gaya shabab ke ham-rah valvala dil ka
ḳhuda ke haath hai ab apna ai ‘qalaq’ insaf
buton se hashr men hoga muamla dil ka
Leave a Reply