madar-e-zat ke girdab se nikal aauun
main apni zaat ke asbab se nikal aauun
bas ek baar to paani pe apna aks dikha
qasam-khuda-ki main sailab se nikal aauun
jo mahv-e-raqs na huun meri ruuh ke hamrah
main aise halqa-e-ahbab se nikal aauun
main apni jagti ankhon se zindagi dekhun
miri tamanna hai main khvab se nikal aauun
tira to lahja bahut dil-shikan hai ai janan
tiri kahani ke har baab se nikal aauun
jo tere lams ki hiddat ko jiit luun to main
phir apni zaat ke barfab se nikal aauun
gundha hua hai miri zaat ke khamir men ye
main kaise alam-e-asbab se nikal aauun
ye raushni miri tahzib ka hi hasil hai
main kaise halqa-e-adab se nikal aauun
jo mera pyaar hai ‘rumi’ agar kabhi mil jaae
main apni zaat ke har khvab se nikal aauun