Shaguft-E-Ghuncha-E-Mahtab Kaun Dekhega

shaguft-e-ġhuncha-e-mahtāb kaun dekhegā

maiñ so gayā to mire ḳhvāb kaun dekhegā

kab ā.eñgī vo ghaTā.eñ jinheñ barasnā hai

mire chaman tujhe shādāb kaun dekhegā

ye bāda-ḳhvār nahīñ dekhte haram hai ki dahr

tumhārī bazm ke ādāb kaun dekhegā

jo shahr ho ga.e ġhārat vo kis ne dekhe haiñ

jo hone vaale haiñ ġharqāb kaun dekhegā

banā rahā huuñ safīna ki ‘saif’ mere ba.ad

bachegā kaun ye sailāb kaun dekhegā

Leave a Comment