maare ghusse ke ghazab ki taab ruḳhsaron men hai
kal to thi phulon men ginti aaj angaron men hai
tab ki sozish se mire chehre ki surḳhi dekhna
kuchh tumhen ḳhush-ru nahin ye phir tarah-daron men hai
ruuh tere ghar ko chhoḌe ye kabhi mumkin nahin
jism mera ḳhaak ho kar us ki divaron men hai
itni zardi saari duniya ki ḳhizan men bhi na ho
jitni aur zalim tiri ulfat ke bimaron men hai
ya ghaTe kuchh ishq mera ya baḌhe duniya men husn
ye to na-kafi hai jitna un dil-azaron men hai
aa.ine men Dalta hai ruḳh pe meri si nigah
tu bhi mere saath ulfat ke gunahgaron men hai
qudrat itne naaz paida kar sakegi ya nahin
un ka jitna sarf tere naz-bardaron men hai
mas.ala kasrat men vahdat ka hua hal tum se ḳhuub
ek hi jhuuT aur tumhare laakh iqraron men hai
qaid men kitni baḌhi mere junun ki kahili
us se kam hai jitni duniya bhar ke be-karon men hai
chand hi kah de jo dekha ho kahin tujh sa hasin
us ne bhi dekhi hai duniya ye bhi sayyaron men hai
kufr ne islam ko shayad kahin maara ki ‘shauq’
matami poshak se ka.aba azadaron men hai
Leave a Reply