gham ka dariya suukh na jaa.e us ki ravani kam na paḌe
ḳhun-e-jigar bhi shamil kar luun aankh men paani kam na paḌe
us ke badan ki ḳhushbu ka kuchh toḌ nikalo aaj ki raat
aur koi ḳhushbu le aao rat-ki-rani kam na paḌe
sal-do-sal ki baat nahin hai umr bahut darkar hai haan
soch raha huun ishq ki ḳhatir ahd-e-javani kam paḌe
a.ine ka dil nahin TuuTe us ka bharam abad rahe
chehre par kuchh aur baḌhao ye hairani kam na paḌe
kar-e-jahan men apni vus.at se ye ḳhud hairan sa hai
adam-zad ko mere maula alam-e-fani kam na paḌe
dard ke saare hi qisson ki yad-dahani kar lena
hijr ki raat bahut lambi hai ek kahani kam na paḌe
raaz bahut se aise bhi hain jo us ko ma.alum nahin
mere yaar ki sohbat tujh ko dushman-e-jani kam na paḌe
Leave a Reply