aap ne qadr kuchh na ki dil ki
ud gai muft men hansi dil ki
khu hai az-bas ki ashiqi dil ki
gham se vabasta hai khushi dil ki
yaad har haal men rahe vo mujhe
al-gharaz baat rah gai dil ki
mil chuki ham ko un se dad-e-vafa
jo nahin jante lagi dil ki
chain se mahv-e-khvab-e-naz men vo
bekali ham ne dekh li dil ki
hama-tan sarf-e-hoshyari-e-ishq
kuchh ajab shai hai be-khudi dil ki
un se kuchh to mila vo gham hi sahi
aabru kuchh to rah gai dil ki
mar mite ham na ho saki puuri
aarzu tum se ek bhi dil ki
vo jo bigde raqib se ‘hasrat’
aur bhi baat ban gai dil ki