yuun hujra-e-ḳhayal men baiTha hua huun main
goya mira vajud nahin vahima huun men
phaila hai jab se ghar men samundar sukut ka
be-chargi ki chhat pe khaḌa chiḳhta huun main
dekho miri jabin pe mire ahd ke nuqush
rakkho mujhe sambhal ke ik aa.ina huun main
ab tak shab-e-qayam ka ik silsila bhi tha
ab aftab ban ke safar par chala huun main
ḳhud se to ru-shanas abhi tak na ho saka
ye ittifaq hai ki jo tum se mila huun main
Leave a Reply