hava badalte hi pahli si dilkashi na rahi
ye kya hua ki vo phulon men tazgi na rahi
kisi ke dard-e-mohabbat ke baḳhshne ki thi der
phir us ke ba.ad kisi chiiz ki kami na rahi
ye sochta huun zamane ka haal kya hoga
agar dilon men mohabbat ki raushni na rahi
tire baghair bhi hansne ko main hansa huun magar
hansi ki tarah labon par kabhi hansi na rahi
miri nigah men ‘shariq’ bahar hai kuchh aur
bahar-e-gul pe na ja ye rahi rahi na rahi
Leave a Reply