havā badalte hī pahlī sī dilkashī na rahī
ye kyā huā ki vo phūloñ meñ tāzgī na rahī
kisī ke dard-e-mohabbat ke baḳhshne kī thī der
phir us ke ba.ad kisī chiiz kī kamī na rahī
ye sochtā huuñ zamāne kā haal kyā hogā
agar diloñ meñ mohabbat kī raushnī na rahī
tire baġhair bhī hañsne ko maiñ hañsā huuñ magar
hañsī kī tarah laboñ par kabhī hañsī na rahī
mirī nigāh meñ ‘shāriq’ bahār hai kuchh aur
bahār-e-gul pe na jā ye rahī rahī na rahī