Kamal Jafari
yuun aa ke sham-e-dard ba-rang-e-sahar ga.i
chehre se mere dhuup ghamon ki utar ga.i
saa.il ki tarah log safon men khaḌe mile
jis rahguzar-e-zist pe meri nazar ga.i
ham rah-ravan-e-shauq ki qismat na puchhiye
manzil jise bhi samjha vo manzil guzar ga.i
vo jan-e-arzu ki jo thi sham-e-anjuman
dil DhunDhta hai us ko na jaane kidhar ga.i
ik shakl-e-dilruba jise dekha tha ḳhvab men
tasvir ki tarah mire dil men utar ga.i
jis bazm-e-dostan men sunate the ham ghazal
afsos sad afsos vo mahfil bikhar ga.i
ab ke bahar aa.i hai manind-e-a.ina
dekha ‘kamal’ main ne to surat nikhar ga.i
Leave a Reply