Kabhi Milte The Wo Humse Zamana Yaad Aata Hai

kabhi milte the vo ham se zamana yaad aata hai

badal kar vaza chhup kar shab ko aana yaad aata hai

vo baten bholi bholi aur vo shokhi naaz o ghamza ki

vo hans hans kar tira mujh ko rulana yaad aata hai

gale men daal kar banhen vo lab se lab mila dena

phir apne haath se saghar pilana yaad aata hai

badalna karvat aur takiya mire pahlu men rakh dena

vo sona aap aur mera jagana yaad aata hai

vo sidhi ulti ik ik munh men sau sau mujh ko kah jaana

dam-e-bosa vo tera ruuth jaana yaad aata hai

tasalli ko dil-e-betab ki meri dam-e-rukhsat

nai qasmen vo jhuti jhuti khana yaad aata hai

vo rashk-e-ghair par ro ro ke hichki meri bandh jaana

farebon se vo tera shak mitana yaad aata hai

vo mera chaunk chaunk uthna sahar ke gham se aur tera

laga kar apne siina se sulana yaad aata hai

kabhi kuchh kah ke vo mujh ko rulana us sitamgar ka

phir ankhen nichi kar ke muskurana yaad aata hai