Jan Kashmiri
is safa.i se miri baat ka pahlu kaaTe
rasta ḳhushbu ke liye jis tarah ḳhushbu kaaTe
ilm hoga shab-e-hijran ki tavalat ka tujhe
meri manind jo ik raat kabhi tu kaaTe
ba.ad men aa.e sabhi mujh se baghal-giri ko
mil ke ahbab ne pahle mire baazu kaaTe
sina-e-shab pe ziyaon ki daraḌen ubhrin
tisha-e-azm se yuun raah ko jugnu kaaTe
zahr-e-mahaul se pur hai mire tan ka kaasa
kyon na mar jaa.e vahin mujh ko jo bichchhu kaaTe
un ke saa.e men raqib aa ke mabada baiThen
sab ke sab us ne shajar the jo lab-e-ju kaaTe
apne zaḳhmon ko ye sahla.egi mahshar tak ‘jan’
din tan-e-zist men yuun ho ke tarazu kaaTe
Leave a Reply