badan par sabz mausam chha rahe hain
magar arman sab murjha rahe hain
purane gham kahan hijrat karenge
dukanon par na.e gham aa rahe hain
ghalatiyan agle vaqton se hui hain
magar sadiyon se ham pachhta rahe hain
yahan hai boriya ab bhi nadarat
bahut din ba.ad vo ghar aa rahe hain
miyan bairun-o-batin ek rakkho
munafiq bhi hamen samjha rahe hain
samajhte hain abhi vo tifl-e-maktab
khilaunon se hamen bahla rahe hain
ghalazat men paḌi hai ruuh jin ki
libason ko bahut chamka rahe hain
bhanvar ka hukm hai dariya pe jaari
kinare naav se katra rahe hain
karun kis kis ka matam baari baari
ḳhazane Dubte hi ja rahe hain
Leave a Reply