Poet
shor ehsas men aisa hai ki mahshar kahiye
har na.e shahr ko chiḳhon ka samundar kahiye
din ka sahra ye siyah dhuup ke umanDe lashkar
dil ko tapte hue neze pe gul-e-tar kahiye
vo hain akash ka manzar ka.i rangon ki tarah
band shishon men mujhe karb ka daftar kahiye
tum sahi phir bhi to murjha ga.e jhilon men kanval
in havaon ko dabi aag ki chadar kahiye
raat din barse hain phulon men magar pyaas rahi
kaise badal men unhen zahr ki gagar kahiye
dard-e-be-dard hai behis hain hison ke paikar
dil ki avaz hai shishon ko bhi patthar kahiye
fikr-o-gham sab ke makanon men base hain yaksan
shish-mahlon ko mire ghar ke barabar kahiye
vo jo aa jaa.en mohabbat ka ujala ban kar
chand ko rang bhari raat ka jhumar kahiye
asman par hai ye ‘asrar’ zamin par hai kabhi
dil ko afaq men uḌta hua shahpar kahiye
Leave a Reply