jise sunaoge pahle hi sun chuka hoga
mujhe yaqin hai ye aisa vaqi.a hoga
yahan to ab bhi hain tanha.iyan javab-talab
vo pahle-pahl yahan kis tarah raha hoga
jo aaj tak hua kuchh kuchh samajh men aata hai
koi bata.e yahan is ke ba.ad kya hoga
ḳhala men pa.enge taara jo duur tak niklen
phir is ke ba.ad bahut duur tak ḳhala hoga
samajhta huun main agar sab alamaten us ki
to phir vo meri tarah se hi sochta hoga
qadim kar ga.i ḳhvahish jadid hone ki
kise ḳhabar thi yahan tak vo da.era hoga
shikasta-pa.i se hoti hain bastiyan abad
jo ab qabila hua pahle qafila hoga
pasand hongi abhi tak kahaniyan us ko
vo mere jaisa koi ab bhi DhunDta hoga
faza zamin ki thi itni ajnabi ki ‘malal’
sitara-var kahin raakh ho gaya hoga
Leave a Reply