main jab vajud se hote hue guzarta huun
ḳhud apne-ap pe rote hue guzarta huun
isi liye to mujhe tu dikha.i deta nahin
main tere ḳhvab se sote hue guzarta huun
gila-guzar dilon se mira guzar hai miyan
main motiyon ko pirote hue guzarta huun
vahi zamana miri raah rok leta hai
main jis zamane se hote hue guzarta huun
tiri gali se bhi ho aa.uun aur pata na chale
jabin ke daagh ko dhote hue guzarta huun
Leave a Reply